രണ്ട്‌ വാക്കുകൾ (കവിത)

രണ്ട്‌ വാക്കുകൾ

രചന: അനീഷ്‌ നായർ

ആലാപനം: കലാമണ്ഡലം രാജേഷ്‌ ബാബു

ഈ പാട്ട്‌ കേട്ടപ്പോൾ മനസ്സിലേക്ക്‌ വന്നത്‌ വളരെ പരിചിതമായ ഒരു ശബ്ദവും, ആലാപനശൈലിയും... കുട്ടിക്കാലത്ത്‌ ദൂരദർശനിൽ "മിലേ സുർ മേരാ തുമാരാ" എന്ന ദേശ ഭക്തിഗാനം പാടിയ "പൻഡിറ്റ്‌ ഭീമസെൻ ജോഷി" എന്ന ഹിന്ദുസ്ഥാനി ക്ലാസ്സിക്കൽ സിങ്ങറിന്റെ ആലാപന ശൈലിയോട്‌, ശബ്ദത്തോട്‌ അടുത്ത്‌ നിൽക്കുന്നു രാജേഷ്‌ ബാബുസാറിന്റെ ആലാപനം...കലാമണ്ഡലം രാജേഷ്‌ ബാബു" എന്ന അതുല്യ കലാകാരൻ ആലപിച്ചപ്പോൾ "രണ്ട്‌വാക്കുകൾ" എന്ന കവിതയുടെ അർത്ഥതലമേ വേറൊരു അനുഭവത്തിലേക്ക്‌എത്തിച്ചേർന്നു....

 ഇനിയും നല്ല അവസരങ്ങൾ അദ്ദേഹത്തിന് ഉണ്ടാവട്ടെ... നല്ല മനുഷ്യരെ തേടിപിടിച്ച്‌അവരെ പ്രോത്സാഹിപ്പിക്കുന്നതിന് മാഷേ അനീഷ്‌ നായർ ഇങ്ങൾക്കും പെരുത്ത നന്ദി ... ദൈവംഅനുഗ്രഹിക്കട്ടെ... 🙏❤️

❤️

KR

കവിത - ജലം

 ചിരിക്കുന്ന ചിരി മാഞ്ഞുപോകുമെന്നറിഞ്ഞിട്ടും...

ഒഴുകുന്ന കണ്ണീർ വറ്റിപ്പോകുമെന്നറിഞ്ഞിട്ടും...

പുൽകുന്ന നിമിഷങ്ങളിൽ ചിരി തൂകി...

നഷ്ടപ്പെടുന്ന നിമിഷങ്ങളിൽ കണ്ണീർപൊഴിച്ച്‌ ...

ജീവിതം അങ്ങനേ ഒഴുകിക്കൊണ്ടേയിരിക്കുന്നു...

പരിഭവങ്ങൾ ബാക്കി വെച്ച്‌...

ഒരാൾ കവിതക്ക്‌ ജന്മം കൊടുത്തപ്പോൾ മറ്റൊരു അതുല്യ കലാകാരൻ കവിതക്ക്‌ ജീവൻവെപ്പിച്ചിരിക്കുന്നു.... ചിരിക്കുന്ന ചിരി മാഞ്ഞുപോകുമെന്നറിഞ്ഞിട്ടും...

അനീഷ്‌ നായർ രചിച്ച്‌ കലാമണ്ഡലം രാജേഷ്‌ ബാബു ആലപിച്ച ജലം എന്ന കവിത..

നിരന്തരം (Short Movie)

മൂന്ന് വർഷങ്ങൾക്ക്‌ മുൻപ്‌, നാട്ടിലെ ഒരവധിക്കാലത്ത്‌ സ്വന്തം സുഹൃത്തുക്കളുടെ കഴിവുകളിൽ വിശ്വാസമർപ്പിച്ച്‌, അവരുടെ കഴിവുകളെ പ്രോത്സാഹിപ്പിക്കുവാനും, അതിലൂടെ നല്ലൊരു മെസ്സേജ്‌ സമൂഹത്തിനു നൽകുവാനും ചെയ്തൊരു ഷോർട്ട്‌ മൂവി. പുതുമുഖങ്ങളെവെച്ച്‌ ഒന്നര ദിവസം കൊണ്ട്‌ ഷൂട്ട്‌ ചെയ്യുമ്പോൾ സമയക്കുറവും, അഭിനയപാരമ്പര്യമില്ലായ്മയുമൊക്കെ വലിയ വെല്ലുവിളികളാണ്. ചിലരുടെ അഭിനയ മികവ്‌ എടുത്ത് ‌പറയേണ്ടിവരുമ്പോൾ, ചിലർ മികച്ച അഭിനേതാക്കളാകേണ്ടുന്ന വഴികളിൽ തങ്ങളുടെപരിശ്രമങ്ങൾ തുടങ്ങിവെച്ചിരിക്കുന്നു. 

രാജു വിളയിൽ തിരക്കഥയെഴുതി, അനീഷ്‌ നായർ സംവിധാനം ചെയ്ത "നിരന്തരം" എന്ന ഷോർട്ട്‌ മൂവിയെക്കുറിച്ച്‌ ആദ്യം പറയേണ്ടത്‌ നിങ്ങൾ തിരഞ്ഞെടുത്ത ആശയം വളരെയധികം പ്രോത്സാഹനം അർഹിക്കുന്നുവെന്നതാണ്.

സമൂഹത്തിൽ സ്ത്രീകൾക്കും കുട്ടികൾക്കുമെതിരെ "നിരന്തരം" നടമാടിക്കൊണ്ടിരിക്കുന്ന ലൈംഗീക പീഢനങ്ങൾക്കെതിരെ, ലൈംഗീക വിദ്യാഭ്യാസത്തിലൂടെ കുട്ടികളിൽ വളർത്തിയെടുക്കേണ്ട ലൈംഗിക അവബോധത്തിന്റെ ആവശ്യകതയിലേക്ക്‌ വിരൽചൂണ്ടുന്ന ഒരു കുഞ്ഞു ചിത്രം. കുട്ടിക്കാലത്ത്‌ ലൈഗിംക പീഢന വാർത്തകൾ കേട്ട്‌ ഒരുപെൺകുട്ടിയുടെ ശരീരത്തിൽ ആരു സ്പർശ്ശിച്ചാലും സംശയദൃഷ്ടിയോടെ നോക്കുന്ന ഞാനുൾപ്പെടെയുളള പെണ്മനസ്സുകൾ അന്നും ഇന്നും ഈ സമൂഹത്തിൽ നിലനിൽക്കുന്നു. ഒരു പുരുഷന്റെ കൂടെ, അത്‌ അച്ഛനായാലും, സ്വന്തം സഹോദരനായാലും ഒരുപെൺകുട്ടിയെ തനിച്ച്‌ വിടുമ്പോൾ വിങ്ങുന്ന അമ്മ മനസ്സുകൾ ഉണ്ടായത്‌ ഈ വാർത്തകൾസൃഷ്ടിക്കുന്ന തെറ്റായ അവബോധത്തിൽ നിന്നാണ്. ശരിയായ ധാരണകൾ വളർത്തി നമുക്ക്‌ നമ്മുടെ മക്കളെ വളർത്താം, അതാണായാലും പെണ്ണായാലും. 

സിനിമയെക്കുറിച്ച്‌; ഏറ്റവും ഇഷ്ടപ്പെട്ടത്‌ അഭിരാമി എന്ന കുഞ്ഞു മിടുക്കിയുടെ അഭിനയം, പിന്നെ "നിരന്തരം" എന്ന പേരും, അതിൽ അവസാനിപ്പിച്ച ക്ലൈമാക്സും. ഒരു പക്ഷേ ഒരുകൂട്ടം കാഴ്ച്ചക്കാർ അതിന്റെ ക്ലൈമാക്സ്‌ ഒരു സെൽഫിയിൽ സന്തോഷമായിഅവസാനിപ്പിച്ചിരുന്നെങ്കിലെന്ന് ആഗ്രഹിച്ചേക്കാം, പക്ഷേ ഈ നിമിഷത്തിൽ പോലും 'നിരന്തരം" ആയി നടന്നുകൊണ്ടിരിക്കുന്ന പീഢനങ്ങൾക്ക്‌ തികച്ചും അനുയോജ്യമായ പേരും, ക്ലേമാസ്സുമെന്ന് ഒരു പക്ഷേ കുറച്ച്‌ കൂടി വ്യക്തമായി ചിന്തിക്കുന്നവർക്കും തോന്നാം.BGM- ചിലയിടങ്ങളിൽ സീനുകളുമായി വളരെ യോചിച്ച്‌ പോയപ്പോൾ, ചിലയിടങ്ങളിൽ ഫാസ്റ്റ്‌ ബീറ്റ്സ്‌ ആവശ്യമില്ലായിരുന്നു എന്ന് തോന്നി. സമയമെടുത്ത്‌ ചെയ്തിരുന്നുവെങ്കിൽ നമ്മുടെ സ്കൂളുകളിൽ കുട്ടികൾക്കിടയിൽ പ്രദർശിപ്പിക്കുവാൻ പറ്റിയ മികവിലേക്ക്‌ സിനിമയെ മാറ്റാമെന്ന് തോന്നി.

അഭിപ്രായങ്ങൾ പറയുവാനും, എഴുതുവാനും എളുപ്പമാണ്. പക്ഷേ "നിരന്തരം" എന്ന കൊച്ചു സിനിമക്ക്‌ വേണ്ടി അനീഷും അതിന്റെ പുറകിൽ പ്രവൃത്തിച്ചവരും എടുത്ത കഷ്ടപ്പാടുകളെ പൂർണ്ണമായും ബഹുമാനിക്കുന്നു.

Keep going Man… so proud of You. നിങ്ങളെ ഇഷ്ടപ്പെടുന്നവരും, നിങ്ങളുടെകലാസൃഷ്ടിക്കായി കാത്തിരിക്കുന്നവരും എന്നും നിങ്ങളോടൊപ്പം.

❤️

KR

ചില്ല്

 

Compassion - Co-suffering എന്ന ലാറ്റിൻ പദത്തിൽനിന്നാണു compassion രൂപപ്പെട്ടത്‌. ഞാൻ, ഞങ്ങളായി രൂപാന്തരപ്പെടുന്ന അപൂർവ്വ ബോധത്തിന്റെ പേരാണു compassion.

Compassion is a mental state endowed with a sense of concern for the suffering of others and aspiration to see that suffering relieved - Thupten Jinpa.

Three phases of compassion;

The cognitive aspect - എനിക്ക്‌ നിന്നെ പിടുത്തം കിട്ടുന്നുണ്ട്‌.

The affective aspect- എനിക്ക്‌ നിന്നോടൊത്ത്‌ വിഷമിക്കാനാകും.

The motivational component- നിന്റെ വേദനകൾക്കുളളിൽ നിന്ന് പുറത്ത്‌ കടക്കുവാൻ നിന്റെകൂടെ ഞാനുമുണ്ടാവും.

ബുദ്ധിയിലും വൈകാരികതയിലും കാൽ വെയ്പിലും ഒരുമിച്ച്‌...

RUMI ….❤️

 

അവൾ... ❣️

കാണാത്ത നിമിഷങ്ങളെ-

പുൽകിയവൾ...

കേൾക്കാത്ത ഈണത്തിനൊപ്പം-

പാടിയവൾ...

അജ്ഞാതമാം പ്രണയത്തെ-

തേടിയവൾ...

കാലത്തിന് അതീതമായി-

 നടന്നവൾ...

❤️

KR

നിരന്തരം

 

നിരന്തരം.... #നിരന്തരം #Nirantharam

ഒരു പറ്റം കലാകാന്മാരുടെ നിരന്തര പരിശ്രമത്തിന്റെ അനന്തരഫലമായ "നിരന്തരം" ഷോർട്ട്‌ മൂവിയുടെ ആദ്യ കാഴ്ചകളിലേക്ക്‌...

Finally, The Teaser is out…

ആദ്യ കാഴ്ച്ചയിൽ അഭിനയ മികവുകൊണ്ട്‌ കുട്ടികൾ ഞെട്ടിച്ചു... മൂന്ന് വർഷത്തെ പഴക്കം, കാണിച്ച ദൃശ്യങ്ങൾക്കും തോന്നിയില്ലാ...

മിന്നിമാഞ്ഞു പോയ കാഴ്ചകളുടെ ഭംഗി ഇനി കാണുവാനുളള ദൃശ്യങ്ങളിലും പ്രതിഫലിക്കട്ടെ ...

ഒരു നല്ല കാഴ്ച്ചാനുഭവം നിരന്തരം എന്ന ഷോർട്ട്‌ മൂവിക്ക്‌ നൽകുവാൻ സാധിക്കുമെന്ന വിശ്വാസത്തോടെ...

All the best team…

Appreciating all Your hard work  Anish Nair …. 

 #Shortmovie

#AnishNair #AjuJohn

❤️

KR

ഒരു സഹവാസ അപാരത...

ഒന്നര വർഷത്തിനു ശേഷം വീണ്ടുമൊരു ഒത്തുചേരൽ....

മ്മടെ ജെഫി മോളും, റിജോയും, അവരുടെ മുത്തിന്റേയുമൊപ്പം....

പിൻ വാതിലിലൂടെ പ്രവേശിച്ചതുകൊണ്ടാകണം, മുറിയിൽ കയറിയ ഉടനെ ഒരശരീരിപോലൊരു പ്രവചനം ഉണ്ടായി;

"ചേച്ചി... ഈ ....കർത്താവിനേയും പന്ത്രണ്ട്‌ ശിഷ്യന്മാരേയും എവിടുന്ന് കിട്ടി?" 

ഒരു ചെറിയ മേശമേൽ നിരത്തിവെച്ചിരിക്കുന്ന കരുക്കളെ നോക്കി വളരെ ഉത്സാഹത്തിൽ ജെഫിമോൾ ചോദിച്ചു.

റിജോയും രെഞ്ചിയും ഞാനും ഒരു പോലെ ഞെട്ടി; ഞങ്ങൾ പരസ്പരം നോക്കി.

റിജോ: "ജെഫി എന്താ പറഞ്ഞേ??!!"

ജെഫി: "കർത്താവും ശിഷ്യന്മാരും ഇരിക്കുന്നൂന്ന്."

ജെഫി ഒഴിച്ച്‌ ഞങ്ങൾ മൂന്നു പേരും ചിരിക്കുവാൻ തുടങ്ങി, ഒന്നും മനസ്സിലാകാതെ ജെഫി ഞങ്ങളെ നോക്കി.

റിജോ: "ജെഫി... അത്‌ ചെസ്സ്‌ ബോർഡും കരുക്കളുമാണു."

ജെഫി: "ആണോ.... 

ചേച്ചി ... ചേച്ചി പറ .. ആ കുതിര പുറത്തിരിക്കുന്ന ആളെ കണ്ടാൽ യൂദാസ്ലീഹായെ പോലുണ്ട്‌. ദേ .. ഈ സ്ത്രീ രൂപത്തെ കണ്ടാൽ മാതാവിനെ പോലുണ്ട്‌.... ഇത്‌ ജോസഫ് ‌പിതാവ്‌...." 

(അങ്ങനെ നിമിഷങ്ങൾക്കുളളിൽ ചെസ്സ്‌ ബോർഡിലെ മിക്ക ആൾക്കാരും കർത്താവിന്റെ കുടുംബക്കാരും, വിശുദ്ധന്മാരുമായി മാറി.)

ഞാൻ: "എന്നാലും ... കുന്തോം പിടിച്ച്‌ നിൽക്കുന്ന ആ ആൾക്കാരെ നീയെങ്ങനെ കർത്താവിന്റെ ശിഷ്യന്മാരാക്കിയെന്ന് ഒരു പിടുത്തവും കിട്ടുന്നില്ലാ ന്റെ ജെഫിയേ.... ഒരു കൊച്ചിന്റെ അമ്മയായിട്ടും നിനക്ക്‌ ഒരു മാറ്റവുമില്ലാല്ലേ??"

ജെഫി: "ചേച്ചി .... അത്‌ പിന്നെ സഹവാസത്തിന്റെ കുഴപ്പമാ..." 

ഞാൻ റിജോയെ നോക്കി ചിരിക്കുവാൻ തുടങ്ങി...

ഞാൻ: "റിജോ.... നിനക്കിട്ടാണു വെപ്പ്‌... ഒരു സഹവാസ അപാരത."

റിജോ: "ഞാനോ..."

അവിടേയും ജെഫിമോൾ തന്നെ സ്റ്റാർ... അന്ന് തൊട്ട്‌ ആ ചെസ്സ്‌ കരുക്കളെ നോക്കുന്ന ഞങ്ങൾക്ക്‌ കർത്താവിനേയും, പന്ത്രണ്ടു ശിഷ്യന്മാരേയും, വിശുദ്ധന്മാരേയുമല്ലാതെ വേറാരേയും കാണുവാൻ സാധിച്ചിട്ടില്ലായെന്നത്‌ വേറൊരു വസ്തുതയും.

❤️

KR