പിതൃതാളം കവിത

 https://youtu.be/1QGA1PhEf9w?si=WUbrXjIPSf9OlHS6

വരികൾ : അനിഷ്‌ നായർ

സംഗീതം: ശിവദാസ്‌ വാര്യർ

ആലാപനം: P ജയചന്ദ്രൻ

അച്ഛനെന്ന് ഉച്ചരിക്കുവാൻ ഇനിയും 

ഏറെ നാൾ കഴിയണം ഓമനേ...

അച്ഛനെ അച്ഛനായ്‌ അറിയുവാൻ നീയുമൊരു അച്ഛനായ്‌ തീരണം പൈതലേ....

മലയാളത്തിൽ ഒരുപാട്‌ നാളിന് ശേഷം അച്ഛനെക്കുറിച്ച്‌ ഇറങ്ങിയ ഏറ്റവും മനോഹരമായഒരു കവിത... #പിതൃതാളം

അച്‌ഛനെന്ന ശ്രേഷ്ഠ നാമത്തെ അക്ഷരങ്ങളിലൂടെ ജന്മം നൽകിയതും, തന്റെകൈപ്പടയിൽ തെളിഞ്ഞ അച്ഛന് ജീവൻ നൽകി, ദൃശ്യ ഭംഗിയാൽ മനോഹരമാക്കിയതുംഅനിഷ്‌ നായർ... അച്ഛനെക്കുറിച്ചുളള എല്ലാ കവിതകളും

അച്ഛനെന്താണെന്ന് പറഞ്ഞു തുടങ്ങുമ്പോൾ,

അച്ഛൻ എന്തല്ലായെന്ന് പറഞ്ഞു തുടങ്ങി, അമ്മയെന്താണെന്ന് പറയുന്നതാണ് ഈകവിതയിലെ വരികളിലെ സമ്പുഷ്ടത!.. വളർച്ചയുടെ പടവുകൾ കയറുന്ന ഒരു കുഞ്ഞിന്റെജീവതാളം പ്രകൃതിയുടെ താളങ്ങളിൽ ലയിച്ച്‌, അമ്മയിലെ താളങ്ങളെ അറിഞ്ഞ്‌, അച്ഛന്റെഉൾത്താളങ്ങളിലേക്ക്‌, അച്ഛനെന്ന സത്യത്തിലേക്കുളള, അറിവിലേക്കുളള യാത്രയാണീകവിത...

അനിഷ്‌ നായർ വരികളിൽ പകർത്തിയ അച്ഛന്റെ ഉൾത്താളങ്ങളെ അറിഞ്ഞ്‌രാഗതാളലയത്താൽ കവിതയുടെ ആത്മാവറിഞ്ഞ്‌ സംഗീതം നൽകിയിരിക്കുന്നത്‌ ശിവദാസ്‌വാര്യർ... ഗൃഹാതുരത്വവും, പഴമയും, ഓർമ്മകളിലൊളിപ്പിച്ച ബാല്യ കാലവും, കാലഘട്ടത്തിന്റെ അനിവാര്യതയുമറിഞ്ഞ്‌ ചെയ്ത സംഗീതത്തിൽ വാര്യർ മാഷെന്നഅതുല്യ സംഗീതജ്ഞന്റെ മാസ്മരികത് വിളങ്ങുന്നൂ...

എൺപതിന്റെ നിറവിൽ പി ജയചന്ദ്രനെന്ന മലയാളത്തിന്റെ മുത്തച്ഛനിലൂടെ ഈ കവിതആലപിക്കപ്പെട്ടപ്പോൾ ഒരു പക്ഷേ ഒരു ജന്മത്തിന്റെ, ഒരു കാലഘട്ടത്തിന്റെ നിയോഗം, പുണ്യംപൂർണ്ണമാകുന്നൂ....

ഗിരിധർ, മാധവൻ അറ്റ്ലസ്‌ എന്നിവരുടെ വേഷപ്പകർച്ച അതിഗംഭീരമെന്ന് തന്നെ എടുത്ത്‌പറയേണ്ടിയിരിക്കുന്നൂ... പ്രതിഭ ഗിരിധർ വളരെ സ്ക്രീൻ പ്രസ്സൻസുളള ഒരുഅഭിനേത്രിയായ്‌ തോന്നി... ആ ചിരിയിൽ ഒരു ഗ്രാമത്തിന്റെ നിഷ്കളങ്കത മുഴുവൻ കൊണ്ട്‌വന്നൂ... മകനായ്‌ വന്ന ബിനോയ്‌ വിജയ്‌, ആശാനായി വേഷം ചെയ്ത വേണുജി, മണ്ണിലെഴുതി പഠിപ്പിക്കുമ്പോൾ ഒരു കുഞ്ഞിനുണ്ടാകുന്ന ഭാവഭേദങ്ങളെ ഏറ്റവുംമനോഹരമായ്‌ അഭിനയിച്ച അഭിഷേക്‌ അങ്ങനെ അഭിനയിച്ച എല്ലാവരും തന്നെഒന്നിനൊന്ന് തങ്ങളുടെ പ്രതിഭ തെളിയിച്ചൂ എന്നത്‌ ഒരു പക്ഷേ ഇതിന്റെ സംവിധായകനായഅനിഷ്‌ മാഷ്ടെ കഴിവും, ഈശ്വരാനുഗ്രഹവുമാണെന്ന് അഭിമാനത്തോട്‌ കൂടിത്തന്നെപറയുന്നൂ.. നാട്ടിൻ പുറവും, തറവാടും, ഉത്സവവും, തെയ്യവും എല്ലാം ഒരുപാട്‌ വർഷങ്ങൾഞങ്ങളെയെല്ലാം പുറകിലേക്ക്‌ കൊണ്ട്‌ പോയിരിക്കുന്നൂ... എഡിറ്റിംങ്ങ്‌ ചെയ്ത ജിതിൻ, റ്റൈറ്റിൽ ചെയ്ത ബിജു കുമാർ, പോസ്റ്റർ ചെയ്ത ഷെറിൻ അങ്ങനെ ഒരുപാട്‌ പേരുടെഅധ്വാനത്തിന്റെ പൂർണ്ണത ഈ കവിതയുടെ പൂർണ്ണതയായ്‌ മാറിയിരിക്കുന്നൂ...

നല്ല ഒരു സൃഷ്ടി സമ്മാനിച്ചതിന് ഇതിന്റെ പിന്നിൽ പരിശ്രമിച്ച എല്ലാവർക്കും ഹൃദയംനിറഞ്ഞ നന്ദി... 🙏

❤️

KR

A Note of Gratitude ❤️🙏

 15.03.24

മഴ പെയ്ത്‌ തോർന്നിരിക്കുന്നൂ... കൊടുങ്കാറ്റും, പേമാരിയും, സുനാമിയും, ഉരുൾപ്പൊട്ടലുമെല്ലാം ഒറ്റമഴയിൽ അനുഭവിക്കുംമ്പോൾ, ഒരുപാട്‌ നഷ്ടങ്ങൾക്കിടയിലും നമ്മെ നഷ്ടപ്പെടുത്താതെ ചേർത്ത്‌ വെച്ച പരമകാരുണ്യത്തിന് നമ്മൾ എത്ര പ്രിയപ്പെട്ടവരെന്ന് അനുഭവിച്ചറിയാൻ കഴിഞ്ഞൂ എന്നത്‌ ഈ യാത്രയുടെ, ഈ ജന്മത്തിന്റെ പുണ്യം...

കരിമ്പടം പുതച്ച 9 മാസങ്ങൾ... നഷ്ടങ്ങൾ ഒന്നിനു പുറകെ ഒന്നായ്‌ സംഭവിച്ചപ്പോൾ, ചുറ്റും നടക്കുന്നതെല്ലാം ഒരു ഭീകരസ്വപ്നമായി ജീവിതത്തിൽ ഇരുൾ മൂടിയപ്പോൾ... നിസ്സഹായതയിൽ ദിശകൾ തെറ്റിയപ്പോൾ... തളർന്നു പോകാതെ ഓരോ കടമ്പകളും തരണം ചെയ്ത്‌ ജീവിതത്തെ തിരിച്ച്‌ പിടിച്ച്‌ കൊണ്ടിരിക്കുമ്പോൾ... ഇരുണ്ടു മൂടിയ കാർമേഘങ്ങൾ വെണ്മയുളളതും, ഉണ്മയുളളതുമായ്‌ മാറിയിരിക്കുന്നൂ... സൂര്യന്റെ കിരണങ്ങൾ നവജ്യോതിസ്സുകളായി എന്നിലെ കൊച്ച്‌ ലോകത്തെ പുൽകുവാൻ തുടങ്ങിയിരിക്കുന്നൂ...

കാലം വെച്ച്‌ നീട്ടിയ അനുഭവത്തോളം വലിയ എഴുത്ത്‌ ഈ ഭൂമിയിലെന്തുണ്ട്‌!.. ചേർത്ത്‌ വെക്കേണ്ടതെല്ലാം ചേർത്ത്‌ വെക്കും, അകലങ്ങളെ പുൽകേണ്ടതെല്ലാം കാണാമറയത്ത്‌ പോയ്‌ മറയും... ദൈവമേ!.. ഈ യാത്രയിൽ നിന്നെ അറിഞ്ഞ ഈ നാളിനോളം വലിയനാളുകൾ ഇനിയെന്റെ ജീവിതത്തിലുമില്ലാ.. വീണു പോകാതെ താങ്ങായി നിർത്തിയ കുറച്ച്‌ മനുഷ്യർ... നീ നിയോഗിച്ച, നന്മ വറ്റിയിട്ടില്ലാത്ത കുറച്ച്‌ മനുഷ്യർ... ഓരോ മനുഷ്യരിലേയും നന്മതിന്മകളെ അറിഞ്ഞ്‌ നന്മയെ വേരൂന്നുവാൻ സഹായിച്ചവർ... കടപ്പാടുകൾ അനവധി... നിന്റെ സാക്ഷ്യമായ്‌, നീയായ്‌ ഈ ഭൂവിൽ തുടരാൻ നീ കനിഞ്ഞ കാരുണ്യത്തിനു നന്ദി... 🙏🙏❤️❤️

The rain is over.. Experiencing all the aftermath of rain is not usual in one’s life… Torrential rain is over.. Water is flowing back to its destination after a devastating flood… The giant waves of the ocean returned to the deep sea leaving the calmness on the shore… Earth is back with its rhythm after the high-frequency earthquake.. The loss is uncountable… Still, I am protected by My Creator amidst scratches and scars left with the roller coaster of experiences…

Ray of hope is peaking through the white clouds and touching the small world of mine… ❤️HE has risen… ❤️ Horizons are guarded now… 9 months of turmoil in life evaporated into the hands of the Lord… You filled me back with the purity of existence… Thank You for sending those who hold the true spirit of You… They showed me the path of love, kindness, compassion, and forgiveness… Gratitude is overflowing to them through my prayers…. Thank You for leaving me on this life path as your testimony….🙏

🙏

KR

ജീവിതം - പാതിയിലെ നേർക്കാഴ്ച്ച

 

Stay with me if You can accept me with all my imperfections… 

എല്ലാവരും നല്ലവരാടോ... പ്രതികൂല സാഹചര്യങ്ങളും, തിക്താനുഭവങ്ങളുമാണ് നമ്മിലെ കുറ്റങ്ങളും, കുറവുകളുമൊക്കെ നമുക്ക്‌ മീതെ വളരുവാൻ വഴിയൊരുക്കുന്നത്‌.... ആ യാത്രയിൽ പരസ്പര ബഹുമാനത്തോടെ കൂടെയൊന്ന് നിന്നാൽ മതി... നമുക്ക്‌ ആരേയും നഷ്ടപ്പെടാതിരിക്കും...

എത്ര വിചിത്രമാണ് ഈ ലോക യാത്ര!... 

ചിലർക്കൊക്കെ അതെല്ലാ സൗഭാഗ്യങ്ങളും നൽകുമ്പോൾ മറ്റുചിലർക്ക്‌ അത്‌ നിർഭാഗ്യത്തിന്റേയും, നിരാശയുടേയും ഒരു തേരോട്ടം മാത്രമാണ്...

ചേർന്ന് നിൽക്കുമ്പോൾ വാതോരാതെ പുകഴ്ത്തുന്നവർ, അകൽച്ചയിൽ ദേശങ്ങളും, അതിർത്തികളും കടന്ന് നമ്മുടെ കുറവുകളെ, കുറ്റങ്ങളെ പ്രചരിപ്പിക്കുവാൻ ശ്രമിക്കുന്നൂ...

ആർക്കൊക്കെയോ നമ്മൾ വെറുക്കപ്പെട്ടവരും, മോശക്കാരുമായി മാറുമ്പോൾ...

മറ്റു ചിലർക്ക്‌ നമ്മൾ സഹാനുഭൂതിയുളളവരും പ്രിയപ്പെട്ടവരുമായ്‌ മാറുന്നൂ... 

തുറന്നു പറച്ചിലുകളും, കുറ്റമാരോപിക്കലും, പക്ഷം പിടിച്ചുളള കൊട്ടിഘോഷിക്കലുമൊക്കെ നല്ലതാണ്... 

പക്ഷേ ഒരു കാര്യം എപ്പോഴും നമ്മുടെ മനസ്സിൽ സൂക്ഷിക്കുക... നമ്മൾ ഇപ്പോൾ മോശമെന്ന് കരുതുന്നവരൊക്കെ ഒരു നാൾ നമുക്ക്‌ പ്രിയപ്പെട്ടവർ ആയിരുന്നൂ എന്ന്... ഈ ലോക ജീവിതത്തിന്റെ സ്നേഹവും, കരുതലും, കരുണയുമൊക്കെ നമുക്ക്‌ പകർന്ന് തന്നവർ ആയിരുന്നൂ എന്ന്... നമ്മുടെ ഈ യാത്രയിൽ നമ്മൾ എന്തായി തീർന്നിട്ടുണ്ടോ അതിനു കാരണക്കാരായവരിൽ ഒരാൾ ആയിരുന്നൂ എന്ന്...

രണ്ട്‌ പേർക്കിടയിൽ പ്രശ്നങ്ങൾ ഉണ്ടാകുമ്പോൾ കഴിവതും അത്‌ അവർക്കിടയിൽ മാത്രം തീർക്കുവാൻ ശ്രമിക്കുക... ഒരു പക്ഷം മാത്രം കേട്ട്‌ മറ്റൊരാളെ വിധിക്കാതിരിക്കുക... ഒരുപക്ഷേ നിങ്ങളറിഞ്ഞ സത്യത്തേക്കാൾ വലിയ സത്യങ്ങൾ പറയുവാൻ മറുപക്ഷത്തിനുണ്ടാവും... അവർ മൗനമായ്‌ ഇരിക്കുന്നൂ എന്നതിനർത്ഥം അവർ കുറ്റക്കാരാണെന്നല്ലാ... ഒരു പക്ഷേ ജീവിതത്തിൽ തോറ്റ്‌ പോയ നിരാശയിൽ ഒന്ന് വിലപിക്കാനാവാതെ, ചങ്കു തകർന്ന് തന്റെ വിധിയെ പഴിച്ച്‌ ജീവിക്കുക ആയിരിക്കും അവർ... അവരോട്‌ നിങ്ങൾക്ക്‌ സ്നേഹമോ, ആദരവോ ഒന്നും തോന്നേണ്ടാ...മറിച്ച്‌ മുറിപ്പെട്ട മനുഷ്യനോടുളള ഒരു കരുണ മാത്രം ചൊരിയുക...

നിങ്ങളിൽ പാപം ചെയ്യാത്തവർ ആദ്യം കല്ലെറിയട്ടെ എന്ന ആപ്തവാക്യം അറിയാവുന്നവർ ആദ്യം കല്ലെറിയുകയും, ഒരാളെക്കുറിച്ച്‌ മോശമായ്‌ സംസാരിക്കുകയും ചെയ്യുമ്പോൾ എന്നും ആരാധനാലയങ്ങളിൽ പോകുന്നത്‌ കൊണ്ട്‌ "നല്ലവർ" എന്നും, സത്യ വിശ്വാസികളെന്നുംഅവകാശപ്പെടുന്നവർ ഏത്‌ ദൈവത്തെയാണ് അറിഞ്ഞിരിക്കുന്നത്‌...

 

ഒരു പക്ഷേ അനുഭവങ്ങളുടെ വേലിയേറ്റത്തിൽ തീരവും കവിഞ്ഞൊഴുകി, എല്ലാംശൂന്യമാക്കി കടലിന്റെ അഗാധങ്ങളിലേക്ക്‌ നിശബ്ദമായി വിടവാങ്ങിയ തിരയെ പിന്നീട്‌ നമ്മൾ കാണുന്നത്‌ ശാന്തമായ്‌ നമ്മുടെ കാലുകളെ പുൽകുന്ന വെണ്മയേറിയ കിങ്ങിണി ജലധാരകളായാണ്... അത്‌ നമ്മിൽ നിറക്കുന്ന കുളിരും, നിർവൃതിയും വീണ്ടുമൊരു പുതുജന്മം നമുക്ക്‌ നൽകും എന്ന് വിശ്വസിക്കുക....

ചേർത്ത്‌ പിടിക്കണ്ടാ.... 

പക്ഷേ ഒറ്റപ്പെടുത്താതിരിക്കുക...

വെറുത്തോളൂ...

പക്ഷേ അപമാനിക്കാതിരിക്കുക...

പടിയിറങ്ങിക്കോളൂ...

പക്ഷേ പക്ഷാപാതം കാണിക്കാതിരിക്കുക...

ജീവിതത്തിലെ പ്രതിസന്ധി ഘട്ടങ്ങളിൽ നമ്മളെ തനിച്ചാക്കി പോകുന്നവർ ഉണ്ട്‌, അവർ നമ്മളെ തനിയെ ജീവിക്കുവാൻ പഠിപ്പിക്കുന്നൂ....

നമ്മളിലെ സത്യം അന്വേഷിച്ച്‌ വരുന്നവരുണ്ട്‌... അവർ നമ്മളെ നമ്മിൽ വിശ്വസിക്കാൻ പഠിപ്പിക്കുന്നൂ....

നമ്മൾ തകർന്നവരാണെന്നറിഞ്ഞ്‌ നമ്മെ ചേർത്ത്‌ പിടിക്കുന്നവരുണ്ട്‌‌... അവർ നമ്മളെവീണ്ടും ജീവിക്കുവാൻ പ്രേരിപ്പിക്കുന്നൂ...

ഈ ലോകത്തിൽ നമ്മുടെ ജീവിതത്തിൽ വന്ന് പോകുന്ന ഓരോ മനുഷ്യരും നമ്മളെ നമ്മളാക്കുന്നൂ.... 

സ്നേഹിച്ചവർക്കും, ചേർത്ത്‌ നിർത്തിയവർക്കും, പടിയിറങ്ങിയവർക്കും, അപമാനിച്ചവർക്കും, വെറുത്തവർക്കും, വേദനിപ്പിച്ചവർക്കും എല്ലാം നന്ദി...🙏🙏

Never judge anyone until you know what is exactly happening in their life..

Everyone is good... It is the adverse situations and hard experiences that make our faults and shortcomings grow on us.... We just need to stand together on that journey with mutual respect... We will not lose anyone...

How strange is our journey in this world !

It brings all the blessings for some while for others 

, it is only a chariot race of misfortune and despair...

When we stay together, we praise each other but the distance is utilized as a tool to spread our shortcomings across the borders… 

The moment distance takes the lead in our life we become holly spirit for someone and hatred being in another’s eyes…

Always keep in mind, that accusations and bragging are quite normal, but people whom we hate today were once the loved ones in our life. Their love, care, and courage had a significant role in developing whom we are today….

Never judge people out of the story what you heard. Please mind that there is always another part of the coin as well…Staying silent is not their conviction of what they are accused of… They might be going through a devastating experience in their life… They might be crying out of their heart in their loneliness and blaming their fate for their unexpected journey in their life…

Please try to solve the issues within your circle…

Never ever judge their decisions being an outsider… 

You don't need to support or oppose, but don't make them feel abandoned..

You can either hate or love someone, but never ever badmouth about someone…

The other person might be extremely bad in your eyes.. but still you can respect and accept that person as he/she is… 

When you have a problem, 

some may leave you in the middle of struggles - they teach you how to live alone…

Some will come to you to know the truth, they teach you to trust the truth within you…

Some will stay with you until you find the broken pieces of yourself and fix it, they teach you what life is…

Thank you to those who loved and trusted me once…

Thank you to those who hate me now…

Thank you to those who still love me and keeping close to your heart…

❤️

KR

ജോസഫ്‌ അന്നംകുട്ടി ജോസഫ്‌ - ദൈവത്തിന്റെ ചാരന്മാർ (Book Review )

2019-ൽ ഇറങ്ങിയ പുസ്തകം സ്വന്തമാക്കീട്ട്‌ ഒന്നര വർഷങ്ങളെടുടുത്തു എന്റെ വായനയുടെ ലോകത്തേക്ക്‌ അതിനു പിറവി കൊളളുവാൻ....

സ്വന്തം ജീവിതാനുഭവങ്ങൾ ചേർത്ത്‌ വെച്ച്‌ എഴുതിയത്‌, ഒരു ഭാവനയാലും സൃഷ്ടിക്കപ്പെടുന്ന എഴുത്തിനോട്‌ സമാനമാവില്ലാ!... തീവ്രങ്ങളല്ലാത്ത, എന്നാൽ ജോസഫിനു താൻ കടന്നു പോയ വഴികളിൽ ഒരു പാട്‌ മാനസ്സിക വ്യഥ നൽകിയ അനുഭവങ്ങൾ!.. തന്റെ കഥയിലൂടെ പറഞ്ഞ മറ്റുളളവരുടെ കഥ ഏറെ ഹൃദ്യം. 

മണിപ്പൂർ പെൺകുട്ടികളുടെ വളരെ ഹൃദയഭേദകമായ അനുഭവങ്ങളിലൂടെ നാടും, സോഷ്യൽ മീഡിയയും കടന്നു പോകുന്ന ഈ സാഹചര്യത്തിൽ ജോസഫ്‌ എഴുതിയ ഈ പുസ്തകത്തിലെ "ഫെമിനിച്ചി" എന്ന അധ്യായത്തെക്കുറിച്ച്‌ രണ്ട്‌ വാക്ക്‌...

ഇതൊരു പെൺകുട്ടിയുടെ കഥയാണ്. വേർപ്പിരിയലിന്റെ വക്കിലെത്തിയ മാതാപിതാക്കൾ. അപ്പൻ മകളെ ഒരു പാർട്ടിക്ക്‌ കൊണ്ടു പോകുന്നു. അപ്പന്റെ കൈകളിൽ പിടിച്ച്‌ അപരിചമായ ലോകത്ത്‌ തന്റെ സുരക്ഷ ഉറപ്പുവരുത്തുന്ന മകൾ. മദ്യ സഭയിലേക്ക്‌ ക്ഷണം കിട്ടിയ അപ്പൻ മകളുടെ കൈകൾ വിടുവിച്ച്‌ പോകുന്നു. തന്നെ തനിച്ചാക്കരുതെന്ന അഭ്യർത്ഥന അയാൾ നിരസിക്കുന്നു. ആരും മിണ്ടുവാനില്ലാതെ അപരിചിതത്വന്റെ ഭീതിയിൽ നിന്ന് രക്ഷപ്പെട്ട്‌ ഒരു മുറിയിൽ കയറി ആ കുട്ടി ഇരിക്കുന്നൂ. പെട്ടെന്ന് അപ്പന്റെ കൂട്ടുകാരൻ മുറിയിലേക്ക്‌ വാഷ്‌റൂം ഉപയോഗിക്കുവാൻ വരുന്നു. അയാൾ വളരെ സ്നേഹത്തോടെ കുട്ടിയോട്‌ ഇടപെട്ടിട്ട് ‌വാഷ്‌ റൂമിലേക്ക്‌ പോകുന്നൂ. തിരികെ അയാൾ വിവസ്ത്രനായ്‌ വന്ന് ആ പെൺകുട്ടിയെ ഏറ്റവും മൃഗീയമായ രീതിയിൽ ഉപദ്രവിക്കുന്നൂ. മദ്യത്തിലും, പാർട്ടിയിലും മുങ്ങിയ ആരും അവളുടെ കരച്ചിൽ കേട്ടില്ലാ. ഇത്‌ പുറം ലോകത്തോട്‌ പറഞ്ഞാൽ തന്റെ അപ്പനെ ജോലിയിൽ നിന്ന് പിരിച്ച്‌ വിടുമെന്ന് ഭീക്ഷണിയും മുഴക്കി... പാവം പെൺകുട്ടി കരഞ്ഞ്‌ തളർന്ന് തന്റെ അപ്പനെ അന്വേഷിച്ച്‌ ചെന്നപ്പോൾ അയാൾ ബോധരഹിതനായ്‌ കിടക്കുന്നൂ. ആ ഉദ്യോഗസ്ഥന്റെ ഭീക്ഷണയിൽ അവൾ ആ വേദനയും, അപമാനവും വർഷങ്ങളോളം മറച്ചു വെച്ചു.

അവൾ ജോസഫിനെഴുതിയ എഴുത്തിൽ ഇങ്ങനെ എഴുതി, "അതേ ചേട്ടാ ഞാനൊരു ഫെമിച്ചിയാണ്, പുരുഷന്മാരെ വെറുക്കുന്ന ഫെമിനിച്ചിയല്ലാ, പുരുഷന്മാരാൽ ഫെമിനിച്ചിയാകേണ്ടി വന്നവൾ. ഇതെന്റെ മാത്രം കഥയല്ലാ, ഒരുപാട്‌ പെൺകുട്ടികളുടെ കഥയാണ്. ഫെമിനിച്ചികൾ എന്ന് എന്നെപ്പോലെയുളളവരെ വിളിക്കുമായിരിക്കും. ഫെമിനിസം എന്ന് പറയുന്നത്‌ നിശബ്ദമായ്‌ സഹിക്കുന്ന പെൺകുട്ട്കൾക്ക്‌ വേണ്ടി സംസാരിക്കുന്ന പെണ്ണിന്റെ സ്വരമാണ്. ഫെമിനിസം ആൺ വിരോധമല്ല, തുല്യതക്ക്‌ വേണ്ടിയുളള പോരാട്ടമല്ലാ, പെണ്ണായി ജനിച്ചു എന്നതിന്റെ പേരിൽ അവൾക്ക്‌ നിഷേധിക്കപ്പെടുന്ന "നീതി" തിരിച്ചു പിടിക്കാനുളള അവളുടെ ശ്രമമാണ്. സ്വാതന്ത്ര്യത്തോടും ആത്മാഭിമാനത്തോടും ഒരു പണ്ണിനെ ജീവിക്കാൻ പ്രേരിപ്പിക്കുന്ന സ്വരത്തിന്റെ പേര്."

ഇതൊരു പെൺകുട്ടിയുടെ കഥയാണെങ്കിൽ, ഇതുപോലെ മറ്റുതരത്തിൽ പീഢനങ്ങൾ അനുഭവിക്കുന്ന ആൺകുട്ടികളും ഉണ്ടാകും!.. അവരുടെയെല്ലാം സ്വരങ്ങൾ ഭയത്തിന്റെ, ഭീക്ഷണിയുടെ മറവിൽ ഒളിപ്പിച്ച്‌ വെച്ചിരിക്കുന്നൂ. നമ്മുടെ സമൂഹത്തിന്റെ കാഴ്ച്ചപ്പാടുകൾ മാറ്റുവാൻ, പ്രതികരിക്കേണ്ടിടത്ത്‌ നമ്മുടെ കുഞ്ഞുങ്ങളെ, സ്ത്രീകളെ, പുരുഷന്മാരെ, വൃദ്ധരെ പ്രതികരിക്കുവാൻ പഠിപ്പിക്കാം!... എന്തും തുറന്ന് പറയുവാനുളള സ്വാതന്ത്ര്യം നമുക്ക്‌ നമ്മുടെ കുഞ്ഞുങ്ങൾക്ക്‌ കൊടുക്കാം. പീഢനത്തിനിരയായവർക്ക്‌ സാധ്യമാകുന്ന ബ്ലാക്ക്മെയിലിംങ്ങിനെക്കുറിച്ച്‌ അവരിൽ‌ അവബോധം സൃഷ്ടിച്ച്‌, അവർക്ക്‌ ധൈര്യം പകർന്ന് ഈ നശിച്ച സാമൂഹിക വൈകൃതത്തെ ഉന്മൂലനം ചെയ്യുവാൻ നമുക്ക്‌ പരിശ്രമിക്കാം!... നാടും, നാടുവാഴികളും, നിയമസംഹിതകളും അതിലെ പൗരന്മാരുടെ, പൗരകളുടെ സുരക്ഷ ഉറപ്പാക്കുവാൻ പ്രാപ്തമാക്കാത്തിടത്തോളം കാലം എന്ത്‌ നേട്ടം കൈവരിച്ചിട്ടെന്ത്‌?

സമൂഹത്തിനു അവബോധം നൽകുന്ന ഈ പുസ്തകങ്ങൾ നമ്മുടെ പുതിയ തലമുറ വായിക്കട്ടെ!...

❣️

KR

തിരികെ ഒരു യാത്ര!...

എന്തിനായിരുന്നൂ ഈ തിക്കും 

തിരക്കുകളും?..

എന്തിനായിരുന്നൂ ഈ പടയോട്ടം?...

എന്തിനായിരുന്നൂ ഞാനെന്നെ 

മറന്ന്,

എന്റെ സ്വത്വത്തെ വെടിഞ്ഞീ യാത്രകളൊക്കെയും?...

ദിക്കെന്തെന്നറിയാതെ, ദിഗന്തങ്ങ-

ളറിയാതെ,

എന്തിനെന്നറിയാതെ, എന്തിനെ-

യെല്ലാമോ,

തേടിയുളള യാത്ര!...

കാഴ്ച്ചകൾ മങ്ങിയ ജീവിതത്തിലെ 

മായക്കാഴ്ച്ചകളെ മറന്ന് 

ഞാനിന്ന് പോകുന്നൂ എന്റെ ഉൾക്കാഴ്ച്ചകളിലേക്ക്‌..

കാലം കൽപ്പിച്ചു നൽകിയ 

ദേശങ്ങളിൽ, 

കാണാത്ത, ഇനിയും കാണുവാ-

നിടയില്ലാത്ത, 

കൂട്ടത്തിൽ കൂടെയോടിയ 

കുറച്ച്‌ മനുഷ്യർ..

ആത്മാവിന്റെ ഭാഗമായ്‌ കൂടെ 

ചേർന്നവർ...

ആത്മാംമശമാണെന്നറിഞ്ഞിട്ടും ആത്മബന്ധങ്ങളെ, 

കാണരുതെന്നാശിച്ച്‌ ദൂരേക്ക്‌ 

അകന്നവർ...

കാഴ്ച്ചകൾ മങ്ങിയ ജീവിതത്തിലെ 

മായക്കാഴ്ച്ചകളെ മറന്ന് 

ഞാനിന്ന് പോകുന്നൂ എന്റെ ഉൾക്കാഴ്ച്ചകളിലേക്ക്‌..

ആത്മാവിന്റെ പാതി പകുത്ത്‌ 

ജന്മം നൽകിയവർ,

ഉളളിലൊളിക്കും സ്വപ്നങ്ങൾക്ക്‌ 

ചിറകുകൾ നൽകിയവർ, 

ഒരു നോക്ക്‌ കാണുവാനാശിച്ച്‌ അകലങ്ങളിലിരിക്കുന്നവർ...

വരവും കാത്തുമ്മറപ്പടിയിലിരുന്ന്‌ വാർദ്ധക്യത്തെ പുണർന്നവർ...

അന്ത്യനാളിലൊരു‌നോക്ക്‌ കാണാതെ

മരണത്തെ വരിച്ചവർ...

കാഴ്ച്ചകൾ മങ്ങിയ ജീവിതത്തിലെ 

മായക്കാഴ്ച്ചകളെ മറന്ന് 

ഞാനിന്ന് പോകുന്നൂ എന്റെ ഉൾക്കാഴ്ച്ചകളിലേക്ക്‌..

നാടായനാടെല്ലാം ഓട്ടം തികച്ച്‌

ഞാനുമെത്തീ-

ഒച്ചപ്പാടുകളില്ലാത്ത ഓട്ടങ്ങളില്ലാത്ത 

ജീവിത സായാഹ്നത്തിൽ...

പിൻ തിരിഞ്ഞു നോക്കുമ്പോൾ

ഞാനറിഞ്ഞൂ-

തേടിപ്പോയവരില്ലാ, തേടിവന്നവരില്ലാ-

കൂടെയോടിയവരാരുമില്ലാ...

നടന്ന വഴികളിലിനി തിരികെ 

ഒരു യാത്രയുമില്ലാ,

തനിച്ചായ പാന്ഥാവിലിനിയനവധി

കാതങ്ങളുമില്ലാ...

കാഴ്ച്ചകൾ മങ്ങിയ ജീവിതത്തിലെ 

മായക്കാഴ്ച്ചകളെ മറന്ന് 

ഞാനിന്ന് പോകുന്നൂ എന്റെ ഉൾക്കാഴ്ച്ചകളിലേക്ക്‌..

മരണമേ! 

നീയെന്ന സത്യത്തിലേ-

ക്കോടിയെത്തുവാൻ മാത്രമല്ലോ

ഞാനീ തികച്ചയീ ഓട്ടങ്ങളെല്ലാ-

മെന്നയുൾക്കാഴ്ച്ചയിലേക്ക്‌

തിരികെ ഒരു യാത്ര!....

❣️

KR