My Dreams and Determinations

My Dreams and Determinations

To have my signature in the World of Letters.

To leave my foot prints in the most beautiful destinations in the world. (Our dream project- Travelogue)

Launching a charitable organization for poor, orphans and destitutes.

To merge into this Nature through the experience of my Love and fervent coupling.

"To win the life through My Secret Wish".


Friday, February 28, 2025

ഉത്രട്ടാതി നക്ഷത്രം ...🌟


                                   Pic Courtesy: Google 

ജ്യോതിശാസ്ത്രത്തിലെ 26-മത്തെ നക്ഷത്രമാണ് ഉതൃട്ടാതി (Sanskrit: उत्तरभाद्रपदा).  വെസ്റ്റേൺ ആസ്‌ട്രോളജി അനുസരിച്ച്‌ പെഗസസ്‌ നക്ഷത്ര സമൂഹത്തിലെ ഗാമ പെഗസി (Algenib), ആൻഡ്രൊമെഡ നക്ഷത്രസമൂഹത്തിലെ ആൽഫ ആൻഡ്രൊമെഡ (Alpheratz) എന്നീ നക്ഷത്രങ്ങളാണ് ഉത്രട്ടാതി. കട്ടിലിന്റെ കാലുകളുടെ ആകൃതിയിലാണിത്‌ കാണപ്പെടുന്നത്‌. 


ഹൈന്ദവ വിശ്വാസം അനുസരിച്ച്‌ നക്ഷത്ര ദേവത അഹിര്‍ബുധ്നി. ശുഭകർമ്മങ്ങൾക്ക്‌ മികച്ച നക്ഷത്രമായും ഇതിനെ കരുതുന്നു.


ജീവിതത്തെ വളരെ ഗൗരവമായി കാണുന്നവരും, വ്യക്തി സ്വാതന്ത്ര്യത്തിന് വലിയ പ്രാധാന്യം നൽകുന്നവരും, ഒരുപാട്‌ ആഗ്രഹങ്ങൾ മനസ്സിൽ കൊണ്ട്‌ നടക്കുന്നവരും, പൊതുവിജ്ഞാനം കൂടുതൽ ഉളളവരും, നല്ല ഓർമ്മ ശക്തിയുളളവരും, എന്നാൽ ഒന്നിലും ഉറച്ച്‌ നിൽക്കാത്തവരുമാണ് ഈ നക്ഷത്രക്കാർ. ഒരു ലക്ഷ്യത്തിലേക്ക്‌ അടുക്കുമ്പോൾ അതുപേക്ഷിച്ച്‌ അടുത്തതിലേക്ക്‌ എടുത്ത്‌ ചാടുന്നവരാണെങ്കിലും, ജീവിത വിജയത്തിനുവേണ്ടി വളരെ അധികം കഠിനമായി പരിശ്രമിക്കുന്നവരുമാണിവർ. മറ്റുളളവരോട്‌ വളരെ സൗഹാർദ്ദമായി പെരുമാറുന്ന ഇവർ, എല്ലാവരെക്കുറിച്ചും ഒരു സംശയം ഉളളിൽ സൂക്ഷിക്കുന്നവരാണ്. എന്നാൽ തങ്ങളുടെ സങ്കടങ്ങളെല്ലാം ഉളളിൽ ഒതുക്കുന്നുവരാണ്. എല്ലാവരോടും ഒരു അകലം സൂക്ഷിച്ച്‌ പെരുമാറുന്ന ഇവർക്ക്‌ സ്നേഹത്തിന്റെയും, വിശ്വാസത്തിന്റേയും പേരിൽ തിരിച്ചടികൾ ലഭിക്കാറുമുണ്ട്‌. 


വളരെ തുറന്ന പെരുമാറ്റരീതിയാണിവരുടെ. അതുകൊണ്ട്‌ മനസ്സിൽ തോന്നുന്നതൊക്കെ ഒരു മടിയുമില്ലാതെ തുറന്ന് പറയും, അതിന്റെ വരും വരായ്കകളെക്കുറിച്ച്‌ ചിന്തിക്കാറുമില്ല. അവരുമായ്‌ പൊരുത്തപ്പെടാത്ത വ്യക്തികളെ അവർ പെട്ടെന്ന് തന്നെ അകറ്റി നിർത്തും. പെട്ടെന്ന് പിണങ്ങുമെങ്കിലും ആരോട്‌ വ്യക്തിവിരോധം വെച്ചുപുലർത്താറില്ല. മാനസ്സികമായി വളരെ ദുർബലരാണിവർ. എന്നാൽ തന്റെ ഇഷ്ടങ്ങൾ ആർക്കുമുൻപിലും അടിയറവു വെക്കാറില്ല. സത്യസന്ധരായ ഇവർ കപടതയുളളവരേയും, കളളം പറയുന്നവരേയും എപ്പോഴും അകറ്റി നിർത്താറുണ്ട്‌. പക്ഷേ താൻ പറയുന്നത്‌ ശരിയെന്ന് എപ്പോഴും വാദിക്കുന്നവരുമാണ്. കുറച്ച്‌ ദേഷ്യം കൂടുതലുളളവർ ദേഷ്യം വരുമ്പോൾ ഒരു നിയന്ത്രണവുമില്ലാതെ പെരുമാറാറുണ്ട്‌. സാമ്പത്തിക കാര്യത്തിൽ പണം ചിലവഴിക്കാൻ മടിയുളളവരാണിവർ. എല്ലാ തൊഴിൽ മേഖലയിലും ശോഭിക്കുന്നവരാണിവർ. 


  • ദേവത - അഹിര്‍ബുധ്നി
  • അധിപന്‍ - ശനി
  • മൃഗം - പശു
  • പക്ഷി - മയില്‍
  • വൃക്ഷം - കരിമ്പന
  • ഭൂതം - ആകാശം
  • ഗണം - മനുഷ്യഗണം
  • യോനി - സ്ത്രീ
  • നാഡി - മധ്യം
  • ചിഹ്നം - ഇരട്ടക്കുട്ടികള്‍


ശനിദശ (10 വയസ്സ്‌ വരെ)

ബാലാരിഷ്ടകൾ കൂടുതൽ ഉളളവരും, പഠനത്തിൽ പ്രതിസന്ധികൾ, അച്ഛനമ്മമാർക്ക്‌ ദോഷങ്ങൾ എന്നിവ ഉണ്ടാകാറുണ്ട്‌. 


ബുധദശ (11-27 വയസ്സ്‌)

നല്ല സമയമായി കണക്കാക്കപ്പെടുന്നു. ജീവിത പുരോഗതിയുടെ പാതയിൽ ഈ കാലഘട്ടം മുന്നോട്ട്‌ പോകുന്നു.


കേതു ദശ ( 28-34 വയസ്സ്‌)

പ്രതിസന്ധികളുടെ കാലമായി കേതുദശയെ രേഖപ്പെടുത്തുന്നൂ. തൊഴിൽ പ്രതിസന്ധി, സാമ്പത്തിക ബുദ്ധിമുട്ട്‌, ബന്ധങ്ങളിൽ വിളളൽ, ഒറ്റപ്പെടൽ, ഒരുപാട്‌ അപവാദങ്ങൾ കേൾക്കുക അങ്ങനെ ഒരുപാട്‌ പ്രശ്നങ്ങൾ തുടർകഥയാകുന്ന കാലം.


ശുക്രദശ (35-54 വയസ്സ്‌)

വലിയ പ്രതിസന്ധികൾക്ക്‌ ശേഷം ജീവിതം പുരോഗതിയുടെ പാതയിൽ മുന്നേറുന്ന കാലം. ജീവിതത്തിൽ നഷ്ടമായതെല്ലാം തിരിച്ച്‌ പിടിക്കുന്ന കാലം.


സൂര്യദശ (55-60 വയസ്സ്‌)

ആരോഗ്യപരമായ പ്രശ്നങ്ങൾ, മാനസ്സികപരമായി സ്വസ്ഥതയില്ലായ്മ അങ്ങനെ ചെറിയ ചെറിയ പ്രശ്നങ്ങളിലൂടെ കടന്നു പോകുന്ന നാളുകൾ. 


ചന്ദ്രദശ (61 -71 വയസ്സ്‌)

വാർദ്ധക്യസഹജമായ അസ്വസ്ഥതകൾ, സന്താനങ്ങളെക്കൊണ്ടുളള മനോദുഃഖം, ഒറ്റപ്പെടൽ എന്നിവക്ക്‌ സാധ്യതയുളള കാലം.


 🔥⛎🔥

      KR


Thursday, February 27, 2025

തിരുവാതിര നക്ഷത്രം.. ⭐️


                                Pic Courtesy: Google 

ജ്യോതിശാസ്ത്രത്തിലെ ആറാമത്തെ നക്ഷത്രമാണ് തിരുവാതിര (Sanskrit:  Ārdrā (आर्द्रा). ശബരൻ നക്ഷത്ര ഗണത്തിലെ ചുവന്ന നക്ഷത്രമാണിത്‌. വെസ്റ്റേൺ ആസ്ട്രോളജിയിൽ ഇതിനെ ബെറ്റൽജെസ്സ്‌ (Betelgeuse) എന്ന് വിളിക്കുന്നൂ. 


ഹൈന്ദവ വിശ്വാസ പ്രകാരം തിരുവാതിര ശിവന്റെ നാളായി കണക്കാക്കപ്പെടുന്നു. ആർദ്ര എന്ന സംസ്കൃത പദത്തിനർത്ഥം പച്ച അല്ലെങ്കി അലിവുളളത്‌ എന്നാണ്. 


ശുഭാപ്തിവിശ്വാസമുളളവരും, തന്റെ കഴിവിൽ പൂർണ്ണമായും വിശ്വസിക്കുന്നവരും, നല്ല ഓർമ്മശക്തിയുളളവരും, അഭിമാനികളും, പ്രായോഗിക ചിന്തയുളളവരും, കഠിനാധ്വാനികളുമാണിവർ. വീഴ്ച്ചകളിൽ നിന്ന് പാഠം ഉൾക്കൊണ്ട്‌ പിന്നീട്‌ അതേ അബന്ധങ്ങളിൽ ചെന്ന് പെടാതെ ജീവിതത്തെ കൊണ്ടുപോകാൻ തിരുവാതിര നക്ഷത്രക്കാർക്ക്‌ പ്രത്യേക കഴിവാണ്. പൊതുകാര്യങ്ങളിൽ നന്നേ അറിവുളളവരാണ് ഇവർ പക്ഷേ അവർക്ക്‌ അർഹതപ്പെട്ട അംഗീകാരം ഒരിക്കലും ലഭിക്കാറില്ല. 


നല്ല വാക്‌ചാതുര്യം ഉളള ഇവർ മറ്റുളളവരോട്‌ നന്നായി ഇടപെടാനും, മറ്റുളളവരുടെ പ്രീത്രിക്ക്‌ പാത്രമാകുവാനും, അതുപോലെ താൻ പറയുന്നത്‌ ശരിയെന്ന് 

സമർത്ഥിക്കാനും മിടുക്കരാണിവർ. എല്ലാവരോടും നന്നായി ഇടപെടുമെങ്കിലും ആത്മബന്ധം സൂക്ഷിക്കാത്തവരാണിവർ. അതുകൊണ്ട്‌ മറ്റുളളവർക്ക്‌ ഇവർ അഹങ്കാരികളായും, ഉപകാരസ്മരണയില്ലാത്തവരായുമൊക്കെ തോന്നാറുണ്ട്‌. സ്വന്തം കാര്യം നോക്കി തന്റെ ജീവിതം എപ്പോഴും സുരക്ഷിതമാക്കിവെക്കുവാൻ അവർ പ്രത്യേകം ശ്രദ്ധിക്കും. ഒരേ സമയം രണ്ട്‌ കാര്യങ്ങൾ ചിന്തിക്കുവാനും പ്രവർത്തിക്കുവാനും ശ്രമിക്കുന്നവരാണ്. ഏത്‌ കാര്യങ്ങൾക്കും ലോകം അറിയുന്ന ഒരു ലക്ഷ്യവും ഉണ്ടാകും, അവർക്ക്‌ മാത്രം അറിയാവുന്ന ഒരു രഹസ്യവുമുണ്ടാകും.


കുടുംബത്തോടും, പ്രത്യേകിച്ച്‌ സന്താനങ്ങളോട്‌ ഇവർക്ക്‌ പ്രത്യേക വാത്സല്യമായിരിക്കും. അവർക്ക്‌ വേണ്ടി എല്ലാം ഉപേക്ഷിക്കുകയും, അതുവഴി നഷ്ടങ്ങളും, വേദനകളും അനുഭവിക്കുന്നവരുമാണ് ഇവർ. മറ്റുളളവരുടെ പ്രശ്നങ്ങൾ പരിഹരിക്കാൻ മുൻപന്തിയിലുണ്ടെങ്കിലും, സ്വന്തം പ്രശ്നങ്ങൾ പരിഹരിക്കുവാൻ അവർക്ക്‌ സാധിക്കാറില്ല. ഏറ്റെടുക്കുന്ന ഉത്തരവാദിത്വങ്ങൾ ഏറ്റവും ഭംഗിയായ്‌ പൂർത്തീകരിക്കും. തനിക്ക്‌ വേണ്ട കാര്യങ്ങൾ ആരോടും ചോദിച്ച്‌ നേടുക തന്നെ ചെയ്യും. തനിക്ക്‌ ഉപകാരമുളളവരെ മാത്രമേ അവർ ജീവിതത്തിൽ ചേർത്ത്‌ നിർത്താറുളളൂ. താൻ ഇടപഴകുന്നവരുടെ നല്ലതും, മോശവും അതുപോലെ രഹസ്യമായതുമായ എല്ലാ കാര്യങ്ങളും മനസ്സിലാക്കുകയും അതിനെക്കുറിച്ച്‌ അഭിപ്രായം പറയുകയും ചെയ്യുന്നവരാണ്.  


ഈശ്വരാനുഗ്രഹം ഉളളവരാണിവർ. സ്വന്തം പരിശ്രമം കൊണ്ട്‌ മാത്രമേ ജീവിതത്തിൽ ഇവർക്ക്‌ വിജയിക്കുവാൻ സാധിക്കൂ. മറ്റുളളവരോട്‌ പകയോ, വിദ്വേഷമോ മനസ്സിൽ സൂഷിക്കുന്നവരല്ല. 


  • ദേവത - രുദ്രന്‍
  • അധിപന്‍ - രാഹു
  • മൃഗം - പെണ്‍പട്ടി
  • പക്ഷി - ചെമ്പോത്ത്
  • വൃക്ഷം - കരിമരം
  • ഭൂതം - ജലം
  • ഗണം - മനുഷ്യഗണം
  • യോനി - നായ് (സ്ത്രീ)
  • നാഡി - ആദ്യം
  • ചിഹ്നം - വജ്രം


രാഹുദശ (10 വയസ്സ്‌ വരെ)

ആരോഗ്യപരമായ്‌ പ്രശ്നങ്ങൾ, മാതിപിതാക്കൾക്ക്‌ ബുദ്ധിമുട്ടുകൾ, കുടുംബത്തിൽ സാമ്പത്തിക ക്ലേശം എന്നിവ ഉണ്ടാകാറുണ്ട്‌. 


വ്യാഴദശ ( 11-26 വയസ്സ്‌)

വിദ്യാഭ്യാസം, ജീവിത പുരോഗതി, നല്ല സൗഹൃദങ്ങൾ, ഇഷ്ടപ്പെട്ട തൊഴിൽ, മനസ്സിനിഷ്ടപ്പെട്ട വിവാഹം അങ്ങനെ ജീവിതം പുരോഗമിക്കുന്ന കാലം. 


ശനിദശ (27- 45 വയസ്സ്‌) 

മനസ്സമാധാനം കുറവ്‌, അലച്ചിൽ, ജീവിതത്തിൽ അലസ്സത, ശാരീരിക പ്രശ്നങ്ങൾ, കുടുംബത്തിൽ പ്രതിസന്ധി, അങ്ങനെ പരാജയങ്ങൾ തുടരുന്ന സമയം.


ബുധദശ( 46 - 62വയസ്സ്‌)

അനുകൂല കാലമായി കണക്കാക്കപ്പെടുന്നു. അതുവരെയുളള തടസ്സങ്ങൾ മാറി ജീവിതത്തിൽ പുരോഗതിയും, സമാധാനവും വന്ന് ചേരുന്ന സമയം


കേതുദശ ( 63-69 വയസ്സ്‌)

പ്രിയപ്പെട്ടവരെ നഷ്ടപ്പെടുകയും, ഒറ്റപ്പെടുകയും ചെയ്യുന്ന കാലഘട്ടം. 


ശുക്രദശ (70 വയസ്സ്‌ തൊട്ട്‌)

ജീവിതത്തിൽ ഈശ്വരചിന്തയിൽ തനിയെ ജീവിക്കുവാൻ തുടങ്ങുന്ന സമയം. 


🔥Indian astrology 🔥

   KR

Tuesday, February 25, 2025

തിരുവോണം നക്ഷത്രം..



Pic Courtesy: Google

ജ്യോതിശാസ്ത്രത്തിലെ 22-മത്തെ നക്ഷത്രമായ, ഗരുഡൻ നക്ഷത്ര രാശിയിലെ ആൽഫ, ബീറ്റ, ഗാമ എന്നീ നക്ഷത്രങ്ങളെയാണ് തിരുവോണം നക്ഷത്രം എന്ന് പറയുന്നത്‌ (Sanskrit: ശ്രവണം). വെസ്റ്റേൺ ആസ്ട്രോളജിയിൽ അക്വയില എന്ന നക്ഷത്ര സമൂഹത്തിലെ ആൾട്ടയർ എന്ന നക്ഷത്രമാണ് തിരുവോണം. 


ഹൈന്ദവ വിശ്വാസത്തിൽ മഹാവിഷ്ണുവിന്റെ ജന്മനാളാണ് തിരുവോണം. ചിങ്ങമാസത്തിലെ തിരുവോണ നാൾ കേരളീയർ ഓണമായി ആഘോഷിക്കുന്നൂ. എല്ലാ ശുഭകാര്യങ്ങൾക്കും ഈ നാൾ ഉത്തമം എന്ന് പറയപ്പെടുന്നൂ.


മകരം രാശിയിൽ ജനിക്കുന്ന ഈ നാളുകാരുടെ സ്വഭാവം പ്രവചനാതീതമാണ് (unpredictable). ആത്മവിശ്വാസമുളളവരും, കാര്യപ്രാപ്തിയുളളവരും,  സ്വന്തം അഭിപ്രായത്തിൽ, തീരുമാനങ്ങളിൽ ഉറച്ച്‌ നിൽക്കുന്നവരും, ആർക്കും പെട്ടെന്ന് മനസ്സിലാക്കാൻ സാധിക്കാത്തവരും, പിടികൊടുക്കാത്തവരുമാണവർ. സ്‌നേഹവും വെറുപ്പും ഒരേപോലെ പെട്ടെന്ന് തന്നെ പ്രകടിപ്പിക്കുന്നവർ. ഒരു സാമൂഹിക ജീവിയാണ്. എല്ലാവരോടും വളരെ സൗഹൃദപരമായി പെരുമാറുവാനും, മറ്റുളളവരുടെ മനസ്സിൽ പെട്ടെന്ന് സ്ഥാനം നേടിയെടുക്കുവാനും, ബന്ധങ്ങളെ നന്നായി കൊണ്ടുപോകുവാനും ശ്രമിക്കുന്നവർ. സ്നേഹക്കൂടുതൽ കാരണം തനിക്ക്‌ സാധിക്കുന്ന സഹായങ്ങളെല്ലാം മറ്റുളളവർക്ക്‌ ചെയ്യും, പക്ഷേ തിരികെ ലഭിക്കുന്നത്‌ വെറുപ്പും, വിദ്വേഷവുമായിരിക്കും. 


പുറമേ വളരെ സൗമ്യതയോടെ കാണുമെങ്കിലും, തങ്ങൾ സ്നേഹിക്കുന്നവർ അവർക്ക്‌ അർഹമായ ബഹുമാനം നൽകിയില്ലെങ്കിൽ, അവരോട്‌ ജീവിതകാലം മുഴുവൻ വാശിയും, വൈരാഗ്യവും, പകയുമൊക്കെ ഉളളിൽ തോന്നുന്നവരാണ്. എല്ലാ കാര്യങ്ങളേയും വിമർശ്ശന ബുദ്ധിയോടെ നോക്കിക്കാണുന്നവരാണ്. പ്രതികരിക്കേണ്ടിടത്ത്‌ മുന്നും പിന്നും നോക്കാതെ പ്രതികരിക്കുക തന്നെ ചെയ്യും. കലഹങ്ങൾ ഉണ്ടാക്കുവാനും കലഹങ്ങൾ പരിഹരിക്കുവാനും ഒരേപോലെ കഴിവുളളവർ. 


തന്റെ ഇഷ്ടങ്ങൾക്ക്‌ വേണ്ടി പണം ചിലവാക്കാൻ ഒരു മടിയുമില്ല ഇവർക്ക്‌, പക്ഷേ പണം ധൂർത്ത്‌ അടിച്ച്‌ കളയാൻ താത്പര്യമില്ലാത്തവരുമാണിവർ. സമൂഹത്തിൽ ആരേയും ആശ്രയിക്കാതെ 

അഭിമാനികളായി ജീവിക്കുവാൻ ഇഷ്ടം. ജീവിതത്തിൽ പെട്ടെന്ന് പുരോഗതി പ്രാപ്തമാക്കുന്നവരല്ല ഇവർ. അമിതമായി ഒന്നിനോടും ആസക്തിയുളളവരുമല്ല. ജീവിതത്തിൽ ഒരു കാര്യം വേണ്ടായെന്ന് വെച്ചാൽ പിന്നെ അതിലേക്കൊരു തിരിച്ചുപോക്കുമില്ല. താൻ പറയുന്നതും, പ്രവൃത്തിക്കുന്നതും പൂർണ്ണമായി ശരിയെന്ന് വിശ്വസിക്കുന്ന ഇവർ സ്വന്തം തെറ്റുകൾ ഒരിക്കലും സമ്മതിച്ചു തരികയുമില്ല. 


  • ദേവത - വിഷ്ണു
  • അധിപന്‍ - ചന്ദ്രന്‍
  • മൃഗം - കരിങ്കുരങ്ങ്
  • പക്ഷി - കോഴി
  • വൃക്ഷം - എരിക്ക്
  • ഭൂതം - വായു
  • ഗണം - ദേവഗണം
  • യോനി - വാനരന്‍ (പുരുഷന്‍)
  • നാഡി - അന്ത്യം
  • ചിഹ്നം - ചെവി


ചന്ദ്രദശ (6 വയസ്സ്‌ വരെ)

ജനനം ചന്ദ്ര ദശയിൽ. 


ചൊവ്വദശ (7- 12 വയസ്സ്‌)

പഠന കാര്യത്തിൽ താത്പര്യക്കുറവ്‌. കുടുംബത്തിൽ പ്രശ്നങ്ങൾ, ആരോഗ്യക്കുറവ്‌ എന്നിവക്ക്‌ സാധ്യത. 


രാഹുദശ (13-30വയസ്സ്‌)

വിദ്യാതടസ്സം, ജോലി ലഭിക്കുവാനുളള അവസരമില്ലായ്മ, വ്യക്തിജീവിതത്തിലും, വിദ്യാഭ്യാസ രംഗത്തും, തൊഴിൽ മേഖലയിലും ഒരുപാട്‌ പ്രതിസന്ധികൾ ഉളള കാലഘട്ടം. 


വ്യാഴദശ (31-46 വയസ്സ്‌)

പുതിയ തൊഴിൽ, നല്ല സാമ്പത്തിക ഭദ്രത, ജീവിതത്തിൽ നേട്ടങ്ങൾ, പുതിയ വീട്‌, പുതിയ സംരഭങ്ങൾക്കുളള കാലഘട്ടമായും വ്യാഴദശ കണക്കാക്കപ്പെടുന്നൂ. 


ശനിദശ (46-65വയസ്സ്‌)

ആരോഗ്യപരമായ പ്രശ്നങ്ങളാൽ നിറഞ്ഞ കാലഘട്ടം. സാമ്പത്തിക നഷ്ടം, തൊഴിൽ നഷ്ടം, ജീവിത പരാജയങ്ങൾ എന്നിവയൊക്കെ തുടർച്ചയാകുന്ന കാലം. 


ബുധദശ (66 വയസ്സ്‌ മുതൽ‌)

ജീവിതത്തെ കൂടുതൽ ലളിതമായി കാണുവാൻ ആഗ്രഹിക്കുന്ന കാലഘട്ടം. ലാഭനഷ്ട കണക്കുകളിലൂടെ, ജീവിതാനുഭവങ്ങളിലൂടെ ജീവിതം ഭദ്രമാകുന്ന സമയം. 


🔥⛎🔥

     KR




Monday, February 24, 2025

കാർത്തിക നക്ഷത്രം...🌞🌝

Pic Courtesy: Google

ജ്യോതിശാസ്ത്രത്തിലെ മൂന്നാമത്തെ നക്ഷത്രമായ, ആറ് നക്ഷത്രങ്ങളുടെ കൂട്ടത്തെയാണ് കാർത്തിക (Sanskrit: कृत्तिका) എന്ന് വിളിക്കുന്നത്‌. വെസ്റ്റേൺ ആസ്ട്രോളജി ഈ നക്ഷത്രത്തെ പ്ളയഡീസ് (Pleiades) എന്ന് വിളിക്കുന്നൂ.

ഇന്ത്യൻ ജ്യോതിഷ പ്രകാരം കാർത്തികയെ വ്യക്തിത്വത്തിന്റെ ദേവതയായിട്ടാണ് പറയപ്പെടുന്നത്‌. ചന്ദ്രദേവന്റെ പത്നിയായും ഹൈന്ദവ വിശ്വാസത്തിൽ രേഖപ്പെടുത്തുന്നു.


ആത്മവിശ്വാസം,കഠിനാധ്വാനം, ശുഭാപ്തി വിശ്വാസം, മറ്റുളളവർക്ക്‌ മാർഗ്ഗനിർദ്ദേശം നൽകുക, മര്യാദയോടെയുളള പെരുമാറ്റം, സഭ്യമായ ജീവിതം നയിക്കുക എന്നിവ ഈ നാളുകാരുടെ പ്രത്യേകതയാണ്. ആരുടെ മുൻപിലും തലകുനിക്കാതെ അഭിമാനത്തോടെ ജീവിക്കുവാൻ ആഗ്രഹിക്കുന്നവരാണ് കാർത്തിക നക്ഷത്രക്കാർ. മറ്റുളളവരിൽ നിന്ന് ഒരു സഹായവും കൈപ്പറ്റുവാൻ ആഗ്രഹിക്കുന്നവരല്ല ഈ നാളുകാർ. വ്യക്തിസ്വാതന്ത്ര്യത്തിന് വളരെ പ്രാധാന്യം കൊടുക്കുന്നവരാണ് ഇവർ. പുറമേ വളരെ കർക്കശ്ശ സ്വഭാവക്കാരായി കാണുമെങ്കിലും, സ്നേഹം, സഹാനുഭൂതി, വാത്സല്യം എന്നിവ അവരുടെ മുഖമുദ്രയാണ്. 


സംഗീതത്തോടും കലകളോടും അവർക്ക് പ്രത്യേകമായ താത്പര്യം ‌ഉണ്ടാകും. പണം സമ്പാദിക്കുവാൻ ഇവർക്ക്‌ പ്രത്യേക കഴിവുണ്ടാകും. പണം, പ്രശസ്തി, സമൃദ്ധി മുതലായവ സ്വന്തം അധ്വാനത്തിലൂടെ മാത്രമേ അവർ നേടുകയുളളൂ. അവർ കഠിനാധ്വാനത്തിലൂടെ ഏത്‌ ലക്ഷ്യത്തേയും കരസ്തമാക്കും. ആരുടേയും ഉപദേശം സ്വീകരിക്കുന്നവരല്ല ഇവർ. പിതാവിനോട്‌ ധാരാളം പൊരുത്തക്കേടുകൾ ഉളള നാളാണിത്‌. 


ഇവർ നിർബന്ധബുദ്ധിയും, വാശിയും കൂടുതൽ ഉളളവരായും പറയപ്പെടുന്നൂ. നിർണ്ണായക തീരുമാനങ്ങൾ എടുക്കുമ്പോൾ എല്ലാവരുടേയും അഭിപ്രായങ്ങൾ അവർ ആരായുമെങ്കിലും സ്വയം മനസ്സിൽ തോന്നുന്ന കാര്യങ്ങൾ മാത്രമേ ചെയ്യാറുളളൂ. തന്റെ ഇഷ്ടങ്ങൾ ആർക്കു വേണ്ടിയും ഹനിക്കുന്നവരല്ല കാർത്തികക്കാർ. സ്നേഹിച്ചാൽ ആവോളം തിരികെ നൽകും, വെറുപ്പിച്ചാൽ മണ്ണോട്‌ ചേരുന്നിടം വരെ വെറുപ്പിച്ചവരുടെ സ്ഥാനം പുറത്ത്‌ തന്നെയാണ്. പക്ഷേ അവരെ വിഷമിപ്പിച്ചവരെ, ദ്രോഹിച്ചവരെ അവർ വെറുതെ വിടാറുമില്ല. പുറമേ വലിയ ധൈര്യശാലികളായി തോന്നുമെങ്കിലും ഹൃദയം കൊണ്ട്‌ അവർ വളരെ ദുർബലരാണ്. അവർ അനുഭവിക്കേണ്ടി വന്ന വേദനകളെ അവർ മറക്കാറില്ല. അതോർത്ത്‌ വീണ്ടും വീണ്ടും വിഷമിക്കുക എന്നത്‌ ഇവരുടെ ദൗർബല്യമാണ്. എടുത്ത്‌ ചാട്ടം ധാരാളം നഷ്ടങ്ങളും അവർക്ക്‌ ഉണ്ടാക്കാറുണ്ട്‌. 


ചടുലമായ സംഭാഷണവും, ദ്രുതഗതിയിലുളള കർമ്മവും ഇവരുടെ പ്രത്യേകതയാണ്. മറ്റുളളവരെ അമിതമായ്‌ വിശ്വസിക്കുകയും, തനിക്ക്‌ ഗുണപ്രദമല്ലാത്തവരെ ചേർത്ത്‌ നിർത്തുകയും, തനിക്ക്‌ ഉപകാരം ചെയ്യാൻ സാധ്യതയുളള ആൾക്കാരെ ഇവർ അകറ്റി നിർത്താറുമുണ്ട്‌. അതുകൊണ്ട്‌ തിരിച്ചടികൾ ഒരുപാടുണ്ടാകുവാൻ സാധ്യതയുണ്ട്‌. ഈ തിരച്ചടികളിൽ നിന്ന് പിന്നീട്‌ പാഠം ഉൾക്കൊണ്ട്‌ ജീവിക്കുവാനും ഇവർ ശ്രമിക്കാറുണ്ട്‌. 


കാര്‍ത്തിക നക്ഷത്രം

  • ദേവത - അഗ്നി
  • അധിപന്‍ - സൂര്യന്‍
  • മൃഗം - ആട്
  • പക്ഷി - പുള്ള്
  • വൃക്ഷം - അത്തിമരം
  • ഭൂതം - ഭൂമി
  • ഗണം - അസുരഗണം
  • യോനി - ആട് (സ്ത്രീ)
  • നാഡി - അന്ത്യം
  • ചിഹ്നം - മഴു


ആദിത്യദശ

1 -4 വയസ്സ്‌ വരെ തുടരെ തുടരെ ആരോഗ്യ സംബന്ധമായ പ്രശ്നങ്ങൾ ഉണ്ടാകാറുണ്ട്‌. മാതാപിതാക്കൾക്കിടയിൽ പ്രശ്നങ്ങൾ ഉണ്ടാകാൻ സാധ്യത. 


ചന്ദ്രദശ

5-14 വയസ്സ്‌ വരെ പഠനത്തിലും, കലാരംഗത്തും ശോഭിക്കും, അച്ഛനമ്മമാർ വീടും പുരയിടവും വാങ്ങുവാൻ സാധ്യതയുളളതായ്‌ കാണുന്നൂ.


ചൊവ്വദശ (15-21 വയസ്സ്‌)

സൗഹൃദവും, സാമൂഹിക ജീവിതവും ആഗ്രഹിക്കുന്ന കാലം. കുടുംബത്തോട്‌ അകന്നു നിൽക്കുന്ന സമയം.


രാഹുദശ (22-39 വയസ്സ്‌)

നഷ്ടങ്ങളുടെ ഒരു തേരോട്ടം ഉളള കാലഘട്ടം. ജീവിതത്തിൽ സ്വസ്ഥതയില്ലായ്മ, കുടുംബ കലഹം, സാമ്പത്തിക നഷ്ടം, തുടങ്ങിയ ബിസ്സിനസ്സുകൾ നഷ്ടപ്പെടൽ അങ്ങനെ പരാജയ ഭീതിയിൽ കഴിയുന്ന കാലഘട്ടം. 


വ്യാഴദശ (40-55 വയസ്സ്‌)

വലിയ നഷ്ടങ്ങളിൽ നിന്ന് ജീവിതത്തെ കരുപ്പിടിപ്പിക്കുന്നത്‌ ഈ കാലഘട്ടത്തിലാണെന്ന് പറയപ്പെടുന്നൂ. നേട്ടങ്ങളും, സാമ്പത്തിക ലാഭവും, പുതിയ സംരഭങ്ങൾക്കുളള കാലഘട്ടമായും വ്യാഴദശ കണക്കാക്കപ്പെടുന്നൂ. 


ശനിദശ (56-74 വയസ്സ്‌)

ആരോഗ്യപരമായ പ്രശ്നങ്ങളാൽ നിറഞ്ഞ കാലഘട്ടം. സ്നേഹിച്ചവരിൽ നിന്ന്, ചേർത്ത്‌ നിർത്തിയവരിൽ നിന്ന് തിക്താനുഭവങ്ങൾ ഉണ്ടാകാം. ആരോഗ്യം സംരക്ഷിക്കുക, മറ്റാരേയും ആശ്രയിക്കാതെ ജീവിക്കുക എന്നതിലൂടെ വാർദ്ധക്യത്തേയും മനോഹരമാക്കാം. 


🔥⛎🔥

     KR